新開始~

一個月多少少.......就同kenny修成正果.......其實都有d突然.......手仔都未拖過就鍚好似次序有d錯~
尋日去ocean park真係好開心好開心~好滿足既一日.......係我最好既生日禮物~
水母水母.......真係好靚好靚~恨左睇好耐好耐~可以同親愛的一齊去睇真係好滿足~
仲有可愛既熊貓~同kenny一樣......淨係識食同訓.........哈哈~

Time's up~

一星期~

迴旋處~

點解佢地兩個人既事要影響我?可能我真係佢地之間既一個障礙.......一日唔解決都會有問題~
雖然佢成日都話唔關我事......但我知道我係佢女朋友心裡面既一條刺~
佢地之間既拉鋸令我覺得好煩......唔知點解我要夾o係中間~~每次聽到佢地鬧交我都充滿罪疚感~
o係果一刻我真係覺得受夠喇......晚晚半夜三更打唻我咪唔使訓囉~
但見到佢唔開心我又覺得好慘.......佢求我幫佢既時候我又心軟........我由一個受害者變成一個破壞人地幸福既衰人~就當我鄧菀怡係前世欠佢......今世要還番俾佢啦~~
我真係唔想因為一個問題而令三個人都痛苦......我唔理到最後結果係點.....總之佢地要一齊咁就以後唔好搵我......呢樣係我要佢應承我既野~我知道佢地係唔會分開.......個女人係要走一早就走左啦~點會而家寧願分開訓仲留o係果度丫~
我好坦白咁同佢講我真係覺得好累.......我唔想要咁樣糾纏不清~~我唔想令自己有做衰人既感覺~
佢覺得我逼佢揀......其實我根本就冇諗過要同佢一齊番......佢問我如果佢同女朋友分開會唔會俾多次機會佢......我話"唔會"!~除非佢改啦.......但我知道一樣野.....豺狼始終係豺狼,係唔會變好~就算佢肯改都絕非一朝一夕既事.....個重點係佢根本就唔鍾意我~
我講左一句"放棄一個你唔鍾意既人比起放棄一個你鍾意既人容易得多,你自己好清楚架~"
佢即刻唔出聲.......我唔想令自己再次變成犧牲品.......佢話o係所有野未解決好之前都唔會諗其他野......唔想再傷害多我一次,無論以後發生咩事都唔會傷害我~
"其實你而家做緊同講緊既野已經傷害緊我......."呢一句說話我真係好想講但最後都係吞左落肚.....我唔想o係呢個時候再踩多佢兩腳~
佢係第一次承認佢過往有傷害過我.......以前佢只會死口唔認~果一刻覺得佢都有一點既良心.......但行為依然係自私~
佢尋日係咁lur我做左一件我認為好差好差既事.........我真係好唔想做......佢係咁lur我叫我幫佢一次......最後我心軟做左.....做完我即刻覺得個心好唔舒服,充滿內疚感~即刻毀屍滅跡~
呢件事根本就好多舊魚,佢自己on 9同條女講我同佢訓過......佢女朋友又無聊出面搵個男人激佢~真係忍唔住要講粗口.......
無啦啦我又變左個導火線~對於佢兩個變態既人唻講~我應該唔會係佢第一個滾既人~呢d小事.....過幾日就冇事啦~做乜搞到好似好嚴重咁呢?
佢女朋友又忍到繼續同佢一齊住,仲接受埋佢同我去街兼o係佢隔離傾電話先好野~反而係我俾佢借唻過橋覺得尷尬~
可能佢真係太愛leo啦~真係兩個都short short地~
或者我一世都唔會明白......亦都冇必要明白~
我鄧菀怡竟然同兩個痴線既人一齊癲~究竟我仲要o係呢個迴旋處兜多幾多個圈先醒?
leo講得o岩.......我呢個角色只係"睇你兩個好得幾耐"~就當我係全世界最衰既人~~
希望快d有新既衝擊啦~

蠢蠢的渡假之旅~

終於完成兩日一夜既海泉灣散心之旅~~渡完假番唻都未好好咁休息過.......好累好累.......呢兩日夜晚又要出去食飯......星期日又番大陸食春茗~唉.......襯番工冇乜野做打個xanga先~~
2-Feb-09
今朝六點九就起身~~七點五出門口~以為自己好醒識搭火車行過中港碼頭~~點知落車之後唔識路......要番去地鐵站由九龍公園行過去~~去到已經八點三喇......以為自己好樣衰......點知kitty仲搞笑......搭錯車去左九龍灣~~佢差不多八點五先到碼頭.......我地幾乎趕唔切上船........真係衰到冇朋友~~
上到船食下野.....傾下偈~我就搞下呢樣,搞下果樣......阿葆同kitty就做睡公主~~個幾鐘既船程好快就到~落船之後就坐車去酒店 check in同換溫泉飛~珠海渡假村俾我想像中新~~房入面仲有samsung LCD電視tim~~超正~
放低d野,換好泳衣,hea下就行番去碼頭買少少野食搭車去海泉灣浸溫泉~又搭個幾鐘車入去~~今次我都忍唔住要訓喇.....
搭車途中eo打俾我~不過我冇聽.....因為唔想破壞渡假既心情~但我都send左個sms話佢知我唔o係香港~我知道係因為我前一晚冇聽佢幾次電話所以佢先會打俾我........真係好麻煩~最近都唔想同佢講野......真係覺得心淡......同好累.....唔想再為d小事嘈同勞氣~
去到海泉灣即刻滿心歡喜衝入去更衣室,放好d野就出去浸溫泉~溫泉種類有好多~~地方都幾大~
室內/室外,冷/熱池~我地浸左紅酒/當歸/咖啡/死海.......好多好多個.....都唔記得有咩lu.......最好笑既係我同kitty諗住sir滑梯~上到去果個人問我識唔識游水.....我又唔知點解好老實咁答佢唔識.......跟住佢就唔俾我sir~~要捱冷咁走番落去.......之後我地去左個專for小朋友既低能池玩~kitty同阿葆玩搖搖板~玩玩下有個人行埋唻叫佢地唔好玩.....因為淨係小朋友先玩得~超低能~我地又訓左個發熱地板......又浸左個沙池~足足由一點幾反到差不多五點先走~~
換好衫就出左去行下影下相......買下手信,搭六點九既車去拱北商場食野~
去到已經八點幾,逛左一陣.......坐低食煲仔飯~食完野就去左整指甲畫花~~跟住就買左d零食,野飲,甜品就打的番酒店~我終於試到大陸kfc個紫薯葡tart~超好味~~
番到酒店沖完涼玩左一陣uno kitty就要訓......我同阿葆就傾計......傾到兩點幾都訓.......不過訓得唔係太好......因為有d熱.......同埋訓唔慣張床~

3-Feb-09
朝早七點幾就醒左.....碌到八點幾阿葆鬧鐘響就起身沖涼洗頭~等阿葆搞掂就落去食早餐~
食完早餐上去執好野十一點左右就check out~拎住d野準備過macau~~去到拱北商場....見到賣衫既shop~忍唔住要行街~最終買左件衫.....哈哈~去到大陸都要shopping~
之後過到macau~去大三巴~入左間賣玩具既鋪頭行......行左好耐好耐......買左好多玩具~~逛完影下相周圍逛下就去搵地方食野......沿路一直都逗留o係精品店~~macau真係好熱.....熱到發瘟~我地聽人講去左間緬甸餐廳食野~叫左春卷,curry角,奶油薄餅,馬拉盞包,魚湯麵,咖哩牛筋拼椰汁雞撈麵同淨椰汁雞撈麵~所有野都好好味~食完野又去逛精品店.....又買野.....買完又番去大三巴買手信~買完去左影貼紙相~六點九就打的去關口準備番珠海搭船番hk~
去到碼頭,阿葆要買大包旺仔小饅頭,於是行去附近既超市搵~~我又試好似變態咁買左好多野食~~哈哈~番到碼頭已經八點四~~要上船~kitty發現佢唔見左袋手信......我地懷疑漏左o係貼紙相鋪~真係陰公~
落船既時候都差不多十點喇.......跟住同阿葆搭182番大圍~去到大圍再轉的士番屋企~
真係超級的累呀.......仲拎住一袋二袋~~番到屋企hea下執下野沖完涼就即刻訓覺........
很鍾意呢個溫泉之旅~~雖然只有兩日......但係好充實~~下次再去我一定要去神秘島~